Naalala ko pa mula sa aking ina

Naalala ko pa mula sa aking ina

Naalala ko ang mga damit na yong tinahi

May isang gustong gusto kong isuot

Dilaw na damit sleeveless kung tawagin

Binurdahan mo ng dalawang aso

Kulay kape at mayroon pang nakakabit

Na laso.

Sa aking unang kommunyon

Ginatsilyong bonnet na kulay puti

Ang pinasuot mo sa akin.

Ang aking tanong, bakit ako walang belo

Tulad nang sinuot ng ate ko.

Hindi mo nakita nang ako’y

Nag-anghel sa prusisyon ng salubong

Sa Piyesta ng Pagkabuhay

Nasa bahay ka lang

Nagsilang  ng bagong anghel

Sa aming magkakapatid

At tuwangtuwang ibinalita ko

Ako ang kumuha ng belo.

Maliit pa ako ng tanungin kita

Bakit ka mahirap di tulad ng mga

Ibang kapatid mo

Ano ang kasagutan sa tanong ng

Isang musmos na hindi maunawaan

Bakit may mahirap at bakit may mayamang tao.

Natatandaan ko pa ang ‘yong mga kwento

Na narinig mo kay Lolo Linong mestiso

Tungkol sa mga spiritung gumagala

Sasabihin niya sa inyong magkapatid

Takpan ang inyong mga mata habang

Hindi nalalampasan ang malalaking puno

Habang  ang tatay ninyo’ y nagsasalita

Umalis kayo dyan

Eto’y mga bata.

Natatandaan ko pa din ang malimit mong

Ikwento sa aming magkakapatid

Sa lumang eskwelahan

Maraming dwende naglalaro sa oras ng aralan

Nililigawan ang inyong maestra, hindi naman

Niya nakikita ang dwendeng may gusto sa kaniya

Habang aliw na aliw kayong mga bata

Sa kahahabol sa mga dwendeng

tumutulay sa writing board at kisame.

Mga pamahiin, mga paniniwala

Mula sa yong mga bibig

Pinalaki mo sa amin

Huwag magtapon ng bigas o kanin

At baka magtampo ang spiritu nila

Di na bumalik sa bahay natin.

Pag ang bata ay biglang iiyak

Sasabihin mong ‘maykan, maykan’

Pababalikin ang natatakot at nawawalang

Spiritu ng bata

At kung kami naman’y may biglang sakit ng tiyan

ay dadalhin kami sa kilalang mangangaway

para tawasin at malaman kung sino ang

may kagagawan ng sakit at makahingi ng laway.

Miyembro ka ng Legion of Mary, Sacred Heart,

Catholic Women’s League, at naging katekista

At sa iyong kabataan ay artista pa sa lokal na sarsuela

Tindera, naging Blue Lady at kung ano-ano pa

Tinagurian  Mommy Tonie  

Tagapagdasal para sa mga kaluluwa.

Para sa ‘yo,  Mommy Tonie,

Maraming, maraming salamat

Di man kita napasalamatan lubos

Sa pagiging ina namin

Sa mga bagay na hindi natin pinagkaunawaan

Patawad  ang aking hiling

Alam mong mahal na mahal ka namin.